เพลง : ของแซ็บอิสาน
ศิลปิน : เทพพร เพชรอุบล

มาน้องมาพี่สิพาไปอยู่อิสาน
ไปกินแกงเห็ดละโงก
ซดน้ำโก้กๆละดอกตูมดอกบาน
อิสานบ่อึดแนวกิน
มีผักอีฮีนละผักกุ่มผักหวาน
บ่เชื่อให้นั่งรถผ่าน
สิเห็นอิสานอุดมสมบูรณ์..

สิเห็นเห็ดปลวกเห็ดไค
ดอกบักใหญ่เกิดขาวจูนพูน
กุดจี่และแมงกินูน
มันบินวุ่นละแส่วหน้าแส่วหลัง
เห็ดเผาะและเห็ดหำฟาน
ดอกบ่บานคือเห็ดตะปู่
ยามเกิดละดินแตกผู้ยู้
เกิดเคียงคู่ ละพร้อมเห็ดกระด้าง
จำพวกเห็ดแผะเห็ดฮา
เกิดตามนาขาวงามสะพรั่ง
บ่ต้องซื้อให้เสียสตางค์
เก็บเลาะทางยามไปไร่นา
โกบเขียดละเต้นอยู่โคบๆ
ร้องโอ้บๆยามฝนตกมา
ปลาบ้อนอยู่กลางไฮ่นา
เอาแหฮาวมาติดทั้งปลาทั้งปู
บักหอยกะติดมานำ
พร้อมกับแมงละงำ
ละแมงดาละหลายคู่
กะปอมแย้ก็แยะหน้าดู
วิ่งหลบอู้ฮูละซวดๆยามแลง
ผักติ้วละต้มจิ้วขนลุก
แกงใส่ปลาดุกกินแล้วมีแฮง
แกงบอนใส่ใข่มดแดง
ผักกะแยงกินกับก้อยปลา
ผักตำนินละลวกกินกับป่น
ผักกะโดนกินกับป่นปลา
ผักกะเดากินกับลาบวัว
ผักลืมผัวก็แซ็บเข้าท่า
ซุ๊บหน่อไม้กับผักกาดยา
ส่วนผักขาให้แกงใส่กัน
ผักแป้นคู่ซุ๊บบักเขือ
แซ็บเอาเหลือน่าอัศจรรย์
ส้มผักเสี่ยนละยิ่งกินยิ่งมัน
ลาบเทานั้นยิ่งมันยิ่งกิน

อ่อมหอยใส่ผักอีเลิด
ผักอีเลิดเกิดอยู่ตามดิน
ตำบักหุ่งกับผักกะถิน
ผักไผได้กิน
สิฮ้องหวาแซ็บหลาย
ลาบไก่ให้ใส่ข้าวคั่ว
ต้มน้องวัวใส่หัวชิงไค
แจ่วเพี้ยอยากให้แซ็บถึงใจ
ต้องหั่นเครื่องใน
เหล้าขาวจังแม่นแนว
ดอกะเจียวเขียวแดงเป็นฝ่า
เก็บเอามาลวกกินกับแจ่ว
ไปนำอ้ายบ่ตาแป๋ว
ไปเอาแนวของแซ็บอิสาน..