เพลง : ต่ำฮายา
ศิลปิน : สมบูรณ์ บุญโรจน์

ต่ำฮายานี้หนา
ต๋ามตี๊ข้าเกยจ๋ำเกยเจื้อ
คนใดใค่ฮ้างใค่เฮื่อ
หื้อเอาป๋าจ่อมมายำ
กับน้ำปู๋สักสองสามบอก
ปอกส้มบ่าโอลงต๋ำ
กิ๋นไปเต๊อะสักสองสามกำ
ป๊ากนี้เป๋นยาวิเศษ
หน้ามอดหน้าลาย
หื้อเอาขี้ควายมาสูนขี้เต้า
สูนไปเต๊อะตี๊ในอองเต่า
แล้วเอาเข้าแปดเข้าตา
วันลูนทั่วหน้าสูจะปากั๋นถามหา
บ่เจื้อไปผ่อเอาเต๊อะตี๊ตำบลศาลา
บ่มีคนหน้าลายสักแห่ง
ต่ำฮายาป๊ากนี้
เป๋นยาสาวหลับเจื่อนอนเจื่อ
หื้อเอาป้อฮ้างผีเบื่อ
กับตึงบ่าวเฒ่าสามคน
เอามานวดเอามาฟั้น
วันไหนแตงยาหื้อมันสามหน
มันก็จะหายดีเป๋นคน
แล้วมันจะตุ้ยปุ๋มสวด
คนใดเป๋นขากเป๋นหิด
หื้อไปซื้อเอาจิ้นไก่
หื้อเลือกเอาตั๋วใหญ่ๆ
เอามาแก๋งอ่อมต้มยำ
ต่ำฮายาป๊ากนี้เป๋นยาผีบอกผีปั๋น
กิ๋นไปเต๊อะสักหกเจ็ดวัน
มันตึงบ่คันบ่ได้เก๋าสักเตื้อ
ต่ำฮายาป๊ากนี้
เป๋นยาของคนเขี้ยวเว่าเขี้ยวหล่อน
หื้อต๋ำพริกแด้อ่อนๆ
ไปโทกะโหล้งหัวควาย
หื้อเขาแหง้นตั้งแต่เมื่อเจ๊า
จ๋นผดตลอดแผวขวาย
แหง้นไปเต๊อะสักสองผากข้าวงาย
เขี้ยวจะออกมาเต๋มปาก
คนใดหัวล้านหัวอง
หื้อเอาขี้แมวโพง
มาสูนขี้เกี๊ยวหมาก
เอามาต๋ำบ่าเลิกเกิกกาก
แล้วต๋ำพริกแด้ลงแตว
เอาหมาเหยืองเข้าตัดเหียหน้อย
เอาแปดเอาตาตี๋นผม
แล้วก็โม๊ะตั้งกล๋างหัวลง
ลวดลงแผวตางง่อน
คนเฒ่าหลังก่อง
หื้อเอาผ้าต่องมัดติดเสายังจาน
เผาเหล็กแดงมีดก่าเข้าซวาด
ตั้งแต่ตะก๊ามผดแผวสันหลัง
ซวาดไปเต๊อะสักสองสามกำ
หลังคนเฒ่าก็จะเป็นคนหนุ่ม