เพลง : เมือบ้านเฮาสา
ศิลปิน : ไท ผญาชัย

ตะเว็นเทิ่งฟ้าเริ่มอ่วยลา ทั้งก้อนขี้ฟ้ากะเลือนหาย
แนมเห็นแสงอ่อนขอบฟ้าไกล เป็นแดดสุดท้ายยามใกล้สิค่ำ

ผู้เฒ่าไล่ควายขึ้นเมือบ้าน อิพ่อเก็บผานเซาหว่านไถ
อิแม่กะต้อนเอาเป็ดไก่ ไล่เข้าไปนอนในฮกในฮัง

* ได้ยินเสียงนกกา ฮ้องเส็งแซวพากันบินแส่วคืนฮังเฮือนเก่า
ลมกะพัดเย็นมาต้องหัวใจให้คิดเห็นเจ้า
ผู้ไปสู้ความเหงา ผู้เอาความฝันไปเสี่ยงดวง โอ้ย...

** เมืองหลวงจั่งแม่นมันใหญ่เจ้าสู้ไหวบ่ล่ะหล่า
คั่นบ่คือกะกลับมา อ้ายยังคอยถ่าอยู่หม่องเก่า
ผู้เฒ่าผู้แก่กะถามหา มื้อใด๋อิหล่าสิมายาม
หัวใจบักอ้ายแฮ่งคิดนำ อิหล่าก้อนคำ เมือบ้านเฮาสา

*** หลบมากินป่นปลาลวกผักอยู่นาเฮาคือเก่า
มาคุ้ยลาบเป็ดแกล้มผักกะเดากินแนวที่เจ้านั้นเคยมัก
เมืองหลวงคนลวงมันหลายคัก คั่นเจ้าเสียหลักให้อ่วยคืน
อยู่กรุงหลับได้บ่เต็มตื่น เจ้าอย่าไปฝืนเด้ออิหล่า

บ่มีไผว่าเจ้าดอกนาง ซุคนคองทางเจ้าคืนหา
เจ้าเฮ็ดได้ดีที่สุดแล้วล่ะ ทางบ้านฮู้ว่าเจ้าเมื่อยหลาย

คืนมาซบไอดินฐานถิ่นอีสาน
กลับมาอยู่เฮือนซานบ้านเฮาสาหล่า
หัวใจเจ้าที่บอบช้ำมีน้ำตา
สิฮ้องใส่ฝนใส่ฟ้าว่ามาเด้อขวัญเอ้ย...